Follow by Email

الجمعة، يوليو 15، 2011

الحوماره



-         أكَلك كاكه ( سربس ) إنتو لي...
-         سربست .. سربست .. مو : سربس .. شنو آني مبرده كاكا عرب ؟
-         أي قصدي : سربست .. سربست .. إنتو ليش ...
-         كاكا عرب إنت ليش ما عندك استنتاج بدماغك ؟! .. صار عشرين سنه آني يعرفك ، ومزابط إسمي، شنو إنت ما عندك استنتاج ؟
-         يا استنتاج إنت ؟ هو إسمك صعب ، وما ينحفظ .. المهم ردت أسألك : إنتم ليش عدكم إعمار ، وشغل ، ونظافه ، والتزام بالقانون ، وإحنا ما عدنه ؟
-         كاكا إنتو نكَريه !! لا تزعل مني ..
-         ليش إنتو على أساس مو نكَريه ، لا تخلينه نحجي ..
-         كاكا عرب، أحنا ناخذ 10% والباقي نشتغل بيه ، مو مثلكم – ما شايفين – توبوكَون 90% وتاكلون هريسه وتلطمون .. بعدين كاكا : إحنا إقليييييييييييم !
-         يعني قصدك إذا إنصير إقليم ، إتصير ( العماره ) حلوه ونظيفه مثل أربيل ؟
-         طبعا .. بس بشرط ..
-         شنو ؟
-         مو تجيبون واحد أبو تمن وقيمه تسووه رئيس إقليم !
-         جا وين إنحطه ؟
-          جا أنحطه طباخ رئيس الأقليم .. وإلا ( الحوماره ) ما يسير براسها خير حتى لو تسيرون دوله !!
-         العماره .. العماره .. مو الحوماره .. إنتل ليش دماغ سز !
-         آني دماغ سز ؟ بشرفي إنتو ( حوماره ) وتبقون ( حوماره ) .. ما دام عدكم نفط بكَد الكويت ، وجهالكم عايشين بنص السيان !
-         شوف سربست .. إذا ما تسحب حجايتك هاي .. والله ل...
-         شتسوي ؟ تزرب كيمياوي ؟

في أمان الله
salehalhamadany@yahoo.com

ليست هناك تعليقات:

إرسال تعليق